Israelo  --  Lando Unika

hejmen

Bonvenon al Israelo : miksaĵo de Oriento kaj Okcidento, de Moderno kaj Antikvo, de Grandaj Imperioj kaj Historiaj Ribeloj.

En Israelo, kvankam ĝi estas nomata oficiale "La Juda Ŝtato", vivas flank' al flanke pli ol 3 popoloj: judoj, araboj, druzoj kaj aliaj. Ĝi estas centro de 4 religioj (judismo, kristanismo, islamo, bahaismo) kaj ĝiajn kulturajn kaj naturajn trezorojn ne eblas taksi. La lando havas kvarmil-jaran historion dum kiu pluraj imperioj regis la regionon, kaj post la reveno de judoj el la "Gola" (la Diasporo, kie la judoj estis devigitaj vivi post la dispelo) la Lando travivas ŝtorman kaj ekscitan modernan historion, kiu estas forĝata ĉiutage.

Havante neĝo-kovritajn montojn en la nordo, verdajn valojn laŭlonge de la Mediteraneo, Jordanon kaj la plej malaltan lokon en la tuta mondo - la Mortan Maron oriente, varmegan dezerton en la sudo, tropikan oazon kaj turisman centron - la urbon Eilat en la plej suda punkto de la mapo – Israelo estas vere unika nature, eksterordinara loko, kuniganta kontrastojn (kaj ne nur naturajn).

Al vizitanto de Israelo oni povas oferti tri pintojn, kies plena traesplorado postulas eĉ pli ol semajnon:

  • Jerusalemo, 4000-jara urbo, sankta al tri religioj, kies muroj atestas pri la pasinta gloro, kies preĝejoj, moskeoj kaj sinagogoj plenas je unika etoso de sankteco, kie la buntaj bazaroj kunfandiĝas kun la modernaj aĉeto-centroj, muzeoj kaj la Hebrea Universitato.

  • La Morta Maro, situanta 410 metrojn sub la marnivelo, kun unika kuraca efiko de la sala akvo, kie oni povas flosante legi gazeton, sed ankaŭ la Judea dezerto, natura perlo, kie profundaj dezertaj kanjonoj kaŝas rokajn basenojn, kie la impona monto de Masada kaj ĝiaj mirindaj elfosaĵoj rakontas pri la heroa morto de tricent judaj familioj, kiuj dum tri jaroj kontraŭstaris la legiojn de la Romia Imperio kaj fine preferis la morton al sklaveco.

  • Tel-Avivo, la urbo de 85-a UK, kiu aĝas malpli ol cent jarojn, eble pli ol ĉiu alia urbo reprezentas la renaskiĝon de Israelo: ĝi kreskis el la sablo, inter dunoj kaj maro, kaj dum malmultaj jardekoj fariĝis la ekonomia, kultura kaj distra centro de Israelo. "Urbo senpaŭza" nomas ĝin la enloĝantoj, kaj vere tia ĝi estas: tage ĝi estas la komerca kaj ekonomia koro de la ŝtato, kaj nokte ĝis matene ĝi transformiĝas al paradizo por nokta vivo: teatroj, aĉetum-centroj, kafejoj, drinkejoj, dancejoj, restoracioj ĉiuspecaj... kaj somere ankaŭ la stratoj, kaj precipe la marbordo logas amasojn da homoj.

    Al tiuj tri elstaraĵoj aliĝas dekoj da kulturaj, religiaj, arkeologiaj kaj naturaj juveloj, kiel la impresaj enarbaraj akvofaloj de Banias kaj la serena Lago de Galileo, ĉirkaŭita de palmarboj kaj montoj, kaj ĉe la alia ekstremo Eilat - kie la tropikaj fiŝoj kaj koraloj de la Ruĝa Maro kuniĝas kun la granitaj dezertaj montoj por krei ripozan etoson for de la pulsanta moderna mondo.

    Israelo estas ankaŭ etnologie kaj socie bolanta mikspoto: ĉi tie restariĝis la juda popolo el la cindroj de la Holokaŭsto, kies teruran historion rakontas la muzeo de "Jad Vaŝem" en Jerusalemo kaj la "Domo de Diasporo" en Tel-Avivo, kie oni povas dum malmultaj horoj sekvi dumil jarojn da historio. Sed tuta Israelo estas ja vivanta etnografia muzeo, kien enmigradis kaj kie miksiĝas kaj lernas kunvivi judoj el ĉiuj partoj de la mondo, judoj kun araboj, israelanoj kun palestinanoj.

    Ni invitas vin sperti la etoson de nia Lando kaj vidi kiel antikvo kaj novo unuiĝas en (re)starigita Israela Ŝtato per viaj propraj okuloj. Ekuzu la "Pasportan Servon", la vojaĝ-proponojn de diversaj turismaj firmaoj aŭ kontaktu rekte la esperantistojn en la Sankta Lando.

    • Legu pli:   Faktoj Pri La Ŝtato  /  Israelo - Biblia Lando  /  La Sankta Urbo Jerusalemo  /  Tel-Avivo, La Kultura Centro de Israelo  /  La Unika Sala Morta Maro

    Saltu rekte al:    
    →   israela reta Esperanto-Centro  ·  Pri Israelo  · ↑ supren